Земјотрес со магнитуда од 5,2 степени според Рихтеровата скала ја погоди покраината Ниѓде во централна Анадолија, соопшти денеска центарот за следење на потреси Кандилили.
Епицентарот на земјотресот бил во Бор, околу 350 километри западно од разорните земјотреси кои ја погодија Турција и Сирија на 6 февруари. Засега нема информации за жртви или причинета материјална штета.
И Сирија денеска соопшти дека во последните 24 часа се евидентирани 61 земјотрес. Два потреса се регистрирани и во северниот дел на Ирак, сооопшти ирачката државна агенција ИНА.
По големите земјотреси на 6 февруари, бројот на загинати во Турција достигна 44.200, додека билансот во Сирија е најмалку 5.900 загубени човечки животи. Од двете земји се евакуирани преку половина милион луѓе.