Европската Унија ќе ѝ воведе десетти пакет санкции на Русија поради инвазијата на Украина, вреден 11 милијарди евра, најави претседателката на Европската комисија Урсула фон де Лаен.
Таа посочи дека со новиот пакет на мета на санкциите ќе се најде и Иран, бидејќи е поврзан со набавка на дронови користени во нападите на Русија во Украина.
Санкционирани се седум ирански организации, пренесува Радио слободна Европа.
Високиот претставник на ЕУ за заедничка надворешна политика и безбедност Жосеп Борел рече дека Русија продолжува да го покажува своето нечовечко лице со бруталниот ракетен терор против цивилни цели.
Санкциите, како што најави, ќе опфатат мерки против банкарскиот систем, напредната технологија, како и санкционирање на речиси 100 дополнителни поединци и субјекти поради нивната улога во поткопувањето на суверенитетот и територијалниот интегритет на Украина.