Собранието констатираше дека министерот за правда Никола Тупанчевски и министерот за животна средина Насер Нуредини си поднеле оставки. Иако имаат такво деловничко право, не ги образложија пред пратениците. Ова повлекување од министерските функции е дел од меѓупартискиот договор во владеачката коалиција, по што на тие места треба да бидат избрани Кренар Лога од Алијанса и Каја Шукова од СДСМ. Попладнево, пратениците ќе дискутираат и по предлогот на премиерот Димитар Ковачевски за разрешување уште тројца министри кои доаѓаа од Алтернатива: Беким Сали, Адмирим Алити и Џемаил Чупи. Нив треба да ги заменат: Фатмир Меџити во Здравство и Азир Алиу во Информатичко општество.
Собранието констатираше оставки и на замениците министри: Владимир Рендевски од Здравство и Агим Нухиу од Правда. Премиерот предлага пратениците да ги разрешат и Башким Хасани од Одбрана, Абдулшуќур Абедини од Земјоделство и Љуљзим Алиу од Образование. Првиот е од ДУИ, но се фракционира со „огнените“, па тие се изјаснија дека нема да ја поддржат реконструкцијата на Владсата. Другите двајца од нив се од Алтернатива. Предлогот содржи петмина нови заменици: Тирон Јајага во Одбрана, Маја Манолева во Здравство, Агим Нухиу во Образование, Викторија Аврамовска-Мадиќ во Правда и Вјолца Бериша во Земјоделство.
Премиерот Ковачевски очекува оваа реконструкција да го зголеми мнозинството во Собранието и да води кон европска и економски стабилна Македонија. Алијанса носи поддршка од осум пратеници, но Алтернатива и нејзините тројца пратеници ја напуштаат Владата.
ВМРО ДПМНЕ утрово одржа координација во присуство на лидерот Христијан Мицкоски и порача дека од ваква Влада не очекува ниту реформи ниту напредок туку криминал, а Алијанса многу бргу ќе ја дочека судбината на Алтернатива.
Соња Николовска