Долгоочекуваниот снег падна, но оние кои заминаа во ски центарот Попова Шапка вчера се соочија со невидена гужва. Над десет илјади возила создадоа колони и за пристигнување и за заминување од скијачкиот центар.
Луѓето во возилата чекаа по два часа да излезат од долгата колона, а до Скопје се патуваше 4 часа. Од тетовската полиција велат дека се било поради недостатокот на паркинг места, а проблем направија и многу возила оставени на несоодветни места, нестрпливоста на возачите и недисциплинираното однесување на не мал број возачи, поради што се создаваа мешаници и бавен проток на возилата во едната и другата насока.
Изминатава недела повеќе денови имаше врнежи од снег, па имаше доволна снежна покривка од над 50 сантиметри за да се обработаат патеките и да може да се скија.