Оваа ситуација каде што полицијата дава предност на бремена жена да помине од утре повеќе нема да се повтори. Не само таа девојка, туку и сите граѓани од утрешниот ден веќе нема да запаѓаат во гужви, свирежи, нервози и доцнење.
„Утре во 10 часот почнува повлекувањето на автобусите од крстосниците кај Црвен крст и кај Мавровка. Булеварот Илинденска останува блокиран од Владата до крстосницата кај Мида во сите 4 коловозни ленти. Нови блокади ќе има кај бараките на Град Скопје“, велат приватните превозници.
Приватните превозници искординирани одлучиле во текот на утрешниот ден да ги запрат блокадите на веќе постоечките крстосници и да ги дислоцираат, но тоа не значи дека нивниот револт е намален.Токму спротивно револтот секојдневно расте и се насочува кон управата на град Скопје.
Превозниците ја обвинуваат градоначалничката дека е виновник за тоа што мора да го трпат граѓаните на град Скопје, за тоа што тие не се исплатени и за хаосот во сообраќајот.
Возачите револтирани велат дека се гладни и задолжени и ќе побараат помош од сите надлежни институции, па дури и од премиерот.
Денеска е веќе четврти ден како приватните превозници „Слобода превоз“ и „Макекспрес“ ги блокираат клучните централни булевари. Тие превозници возат на 15 градски и приградски линии и повеќе од месец дена се во судир со градските власти поради долг од над 1,5 милион евра. Станува збор за средства кои ЈСП треба да им ги исплати на приватниците за плати и режиски трошоци.
Тамара Марковска