Додека бил министер за правда, никогаш не го искористил дискреционото право да дозволи некому предвреме да полага правосуден испит, тврди поранешниот министер за правда, Аднан Јашари во вечерашната „Топ тема“.
„Најодговорно тврдам дека додека сум бил министер, во ниту еден случај не сум се повикувал на такво право. Тргнувајќи од анализите што ги направив, од 1988 година и првиот закон за правосуден, се до последниот во 2019 година, сите закони на сите министри им давале такво право“, вели Јашари.
Во член 4 од новиот закон од 2019 година, посочи тој, е нагласено дека се забранува предвремено полагање на правосуден испит.
„Во нашиот Устав, во член 8, во кој се зборува за темелни вредности на уставниот поредок на Република Македонија, во став 2 се вели дека во Република Македонија слободно е се што со Устав и закон не е забрането. Министрите во одредени периоди, јас не знам кој го има користено, се повикуваат на член затоа што нема забрана, но јас го немам искористено“, одговори Јашари на новинарското прашање на новинарката Фросина Факова Серафиновиќ.