Заменик претседателот на Владата задолжен за европски прашања, Бојан Маричиќ, на денешниот брифинг со новинарите соопшти дека следната недела ќе пристигне Извештајот на Европската комисија за напредокот на државата и дека истиот очекува да биде позитивен.
„Очекуваме позитивен Извештај кој несомнено ќе биде наш водич за следните реформи и активности, со сите негови добри и помалку добри оценки. Ова ќе биде прв Извештај од почетокот на преговорите и не очекувам да има некакви изненадувања“, рече вицепремиерот Маричиќ.
Вицепремиерот и главен преговарач со Унијата, Маричиќ брифираше и дека од 7 ноември, со почетокот на билатералните состаноци, ќе има разделување со албанскиот преговарачки тим, и дека одделно ќе го продолжиме билатералниот скрининг.
Маричиќ навести дека во фокус на скринингот ќе бидат владеење на правото, реформа на јавната администрација и функционирање на демократските институции во земјава, за што се очекуваат патокази за сите три области до март идната година. Првите два се задолжителни и без нив не може да се отвори Кластерот, додека пак патоказот за функционирањето на демократските институции е доброволен, но е добро да го имаме и него изготвено, вели тој.
На прашањето за уставните измени и внесувањето на Бугарите, Хрватите и Црногорците во Уставот, Маричиќ истакна дека тоа е обврска која сме ја презеле и дека не би било добро да го завршиме скринингот, а да не ги имаме завршено останатите обврски, додавајќи дека тоа би значело и прекин на преговорите со Унијата.