Ниту една дигитална платформа и алатка без која не можевме да функционираме во изминативе две години на пандемија не може во виртуелниот простор да ја долови денешната атмосфера, припаѓањето на УКИМ е чест, но и одговорност. Со овие зборови ректорот Јанкуловски им посака добредојде на бруцошите и нивните професори на првиот академски час на УКИМ.
- Пред сите нас стојат многу предизвици, наша задача, наша желба е да ви пренесуваме знаења, да ве воведуваме во непресушните извори и светските научни дострели на фундаменталните и на апликативните науки. Денес започнувате со нова развојна етапа која бара сериозен пристап, затоа што суштински ќе ви ги дефинира и ќе ви ги насочи вашите животи- проф.д-р Никола Јанкуловски, ректор на УКИМ.
Студентите велат дека имале мноштво дилеми каде да го продолжат своето високо образование, во која мера се вреднува знаењето денес во земјата во која живеат и се образуваат. Сепак се радуваат на средбата со новите колеги и професори.
За оние кои се одлучија да се запишат на Еконмскиот факултет секое време носи нови предизвици, во овој случај тоа е економската криза и тешката зима која се најавува е причина секој да го даде својот максимум во дејноста во која би бил вистински професионалец.
- Може да биде полошо секогаш, но оптимизмот е на високо ниво. И подобро да гледаме на подобро, одошто да бидеме песимисти. Затоа што како гледаме на работите така и ќе се одвиваат. Оптимист сум и мислам дека доаѓаат подобри времиња.
Со Конкурсот за упис на додипломски студии во учебната 2022/2023 година, на Скопскиот универзитет беа слободни 10 918 места: 5306 за редовни студенти финансирани од буџетот кои плаќаат годишна партиципација од 200 евра. За редовни студенти кои ќе плаќаат школарина од 400 евра беа наменети 4522 места и 1090 места за вонредни студенти.
Нина Стефанова