Со учество на 60 семинаристи од 17 земји од светот, што е рекорден број во последниве години, денеска во Охрид започна 55 Летна школа на Меѓународниот семинар за македонски јазик, литература и култура.
Ова е доказ за интересот за изучување на нашиот јазик, литература и култура, рече ректорот на УКИМ, Никола Јанкуловски на отворањето. Според него, по 3 години на семинарот се вратиле македонсти од Романија , присутни се од САД и Јужна Кореја , а расте интересот за изучување и во Грција. Во иднина македонистиката ќе биде предмет и на универзитетите во Австрија, Германија и Италија. Но, Бугарија не го признава македонскиот јазик. Во тој контекст, ректорот на УКИМ кажа дека колку се посилни нападите кон македонскиот јазик, толку сме поисправени во неговото институционално негување и развој .
Чекориме исправено по стапките на Конески и колку се посилни нападите , колку се пониски навредите упатени на адреса на македонскиот јазик, литература и култура, толку сме поисправени како високообразована и научна институција која што го негува и развира македонскиот јазик, литература и култура која што образува кадри на македонски јазик, вели Никола Јанкуловски – ректор на УКИМ.
Побогати сме за 1000-ци промотори на македонскиот јазик и културни амбасадори на Македонија низ светот. Се додека има говорници на еден јазик тој ќе постои, кажа претседателот Пендаровски.
Се додека постоиме и говориме на македонски, ниту една негација, фуснота, забелешка или што и да е, не ќе може да ја прикрие вистината. Сите ние кои ги изговараме македонските зборови сме гарант за неговото постоење и сила. Ниту еден документ , деклација, изјава , не можат да обезбедат постоење и траење на еден јазик ако не е жив, истакна претседателот Стево Пендаровски.
Цитирајќи го Кристе Петков Мисирков, директорката на МСМЈЛК , Весна Мојсова Чепишевска кажа дека сме должни да го сакаме нашиот јазик зашто тој е наша татковина. Жилави сме и не се откажуваме од таа приказна, дополни Мојсова- Чепишевска.
На отворањето беа промовирани Зборникот од ланското издание на Летната школа и второто, допонето издание на три учебници за изучување на македонскиот јазик за странци. Летната школа на Меѓународниот семинар ќе заврши на 2 септември.
Сотир Трајков