Дваесет и девет седници чекаат да се вратат пратениците од летување. По едномесечниот одмор што им почна вчера, првата нова седница е закажана дури на 15 септември, што остава простор и за продолжување на одморот.
Клучен проблем е кворумот, што се покажа и на последната седница одржана годинава, но претседателот на Собранието ги обвинува комисиите за неажурност. Од вкупно 973 точки на дневен ред на пленарни седници, останале неразгледани 80, од причина што во комисиите не се одржале седници.
Најмногу предлог-закони, 36, се останати на Комисијата за политички систем и односи меѓу заедниците, со која претседава Соња Мираковска од НСДП. Меѓу нив се законот за прекршоци, Изборниот законик кој чека јавна расправа, Законите за влада и за пратеници,извештај од Антикорупциската комисија и неколку закони од Левица.
На второ место по заостанати закони, 22, е Комисијата за финансирање и буџет, чиј претседател е Бојан Стојановски од ВМРО-ДПМНЕ. Од април чекаат законите за ревизија на претпристапната помош, за даночна постапка, за игри на среќа, финансиската полиција и други, за кои седницата или била прекината, или воопшто не е свикана.
Комисијата за транспорт, со која претседава Владо Мисајловски од ВМРО-ДПМНЕ доцни со 19 закони, а Комисијата за здравство, со која претседава Арбен Зибери од ДУИ ја чекаат 16 закони, од кои прв е законот за проектот „Нов Клинички центар“.
На пратениците од Комисиите за Труд и социјална политика и Европски прашања со кои исто така претседава ДУИ чекаат по 11 закони, а на Земјоделство и шумарство, 10.
Новата учебна година ќе почне без законите за наставници, основно и средно образование, затоа што оваа комисија има осум незавршени седници. 7 незакажани седници и една одложена, има и Комисијата за надворешна политика, додека најмалку работа ја чека Комисијата за одбрана, која има заостанати само две точки на дневен ред.
Далиборка Демјанска Цветановска