Денешниот резултат е разочарувачки, на СДСМ му е зададен тежок удар, не само од граѓаните, туку и од симпатизерите и поддржувачите на партијата, изјави лидерот Димитар Ковачевски во вечерашното обраќање до јавноста по парламентарните и претседателските избори. Тој најави детална анализа на резултатите во наредниот период и да се најдат причините за, како што рече, „овој поразителен исход“.
„Не сакам да носам избрзани заклучоци и не сакам да посочувам виновници. И јас и партиското раководство имаме одговорност, и сите избрани и именувани функционери имаат одговорност, вклучитечнои и сите партиски функционери на локално и на централно ниво. Никој, реално, не е без одговорност и сите ќе мораме да минеме низ овој процес. СДСМ ќе треба добро да погледне навнатре, да размисли што направивме и кои се резултатите и слабостите во последните четири години, можеби и во последните седум години. И уште поважно, што е тоа што треба да направи за да ја врати довербата на граѓаните што ја изгубивме. Процесот на обнова мора да е на сите нивоа. Затоа повикувам на нови внатрешни избори на сите партиски тела и на локално и на централно ниво, почнувајќи од претседателот на партијата“, порача Ковачевски.
Тој ја честита победата на најголемиот политички ривал на СДСМ – ВМРО-ДПМНЕ, но и на претседателската кандидатка, Гордана Силјановска Давкова.