На влезот на скопско Драчево табла на која пишува дека на 12 км. десно води пат до селото Црвена вода. Возејќи по патот немаше нова табла за влез во селото, а таму наидовме на неколку крави, кучиња, по некој жител, тишина и звуци на птици. Мештаните се запознати дека денеска има избори, но многу мал е интересот за гласање, поради, како што велат, лошиот пат и услови за живот.
Гласањето во село Црвена вода денеска се одвива во амбиент различен од големите градски средини. Се гласа во импровизирана училница, а на листата на жители со право на глас се 40 лица.
Според кажувањата на мештаните, иако сите се запишани на хартија оваа бројка е намалена поради масовното исселување.
Слична беше ситуацијата и во соседното село Полиград, иако таму во избирачки список се запишани дури 242-ца граѓани.
Во нашата неколкучасовна посета на скопските села, скоро и да не забележавме граѓани кои се упатија на гласачките места да гласааат за претседателските избори.
Симона Петровска