Израел и Хамас го постигнаа првиот договор по ноемврискиот за размена на заложници за затвореници и по повеќе од 100 дена од почетокот на војната во Појасот Газа. Во него посредуваа Катар и Франција и се однесува на лекови за израелските заложници и палестинските цивили. Два катарски авиона со 61 тон со фармацевтски средства, но и хуманитарна помош слетаа во Египет и се упатија кон палестинската енклава. Договорот се толкува како прв значителен напредок во индиректните преговори меѓу завојуваните страни во Појасот во кој продолжуваат борбите по смртоносната ноќ на бомбардирање.
Шпанскиот премиер Педро Санчез од светскиот економски форум во Давос предупреди дека иднината на меѓународниот поредок и светски просперитет е под закана од војните во Украина, Сирија и во Газа. Според него, економската отвореност, меѓународната солидарност и мултилатералниот систем се загрозени од оние кои промовираат фрагментација, заплашување и употреба на сила за наметнување на нивните интереси.
Шпанскиот премиер побара итен прекин на огнот меѓу во Појасот Гаса и повика на меѓународна мировна конференција за формирање на палестинска држава заедно со Израел.
Паралелно со катастрофалната состојба во Појасот Газа, се разгорува ситуацијата и во Црвеното Море. Соединетите Американски Држави ги прогласија Хутите за терористички ентитет по воздушните удари врз позиции на милитантите во Јемен. Американско-британскaтa кампања дојде по бранот напади на јеменските бунтовници врз комерцијални бродови во Црвеното Море. Одлуката значи и замрзнување на средства на бунтовничката група и забрана за влез на нивни членови во земјата.
Сашко Димовски