Поради труење по наводно конзумирање на загадени газирани пијалоци во Хрватска, се прават анализи, а во истрагата се вклучија и полицијата и Државниот инспекторат.
Министерот за здравство на Хрватска Вили Берош за Н1 потврди дека и денеска има неколку нови случаи, но дека ситуацијата е под контрола.
„Има уште неколку, сите се полесно повредени, кај многумина е прашање дали се работи за хемиска повреда или психогена реакција или некоја друга патолошка состојба. Треба да бидеме внимателни и да не паничиме“, рече Берош.
Случајот со четвртиот пациент во Хрватска за ТВ Нова го потврди Рајко Остојиќ, специјалист по гастроентерологија и хепатологија и раководител на Одделот за гастроентерологија во КБЦ Загреб.
„Примивме пациент околу 20:00 часот. Се работи за млад човек кој е во клинички добра состојба, лекувањето е во тек и засега изгледа клинички добро“, рече Остојиќ и додаде дека постои сомнеж дека се работи за труење од пијалок. Но, нагласи дека се чека детална обработка.