Во конфликтот меѓу регионалните пожарникари од Галиција и локалната полиција во градот Оренсе во Шпанија, повредени се неколку лица од кои едно потешко, односно со скршеници на лицето и носот.
Физичката пресметка беше кулминација на протестите на пожарникарите кои, според полициски извори, се обиделе да влезат во зградата на Покраинскиот совет. За време на протестот, пожарникарите фрлале различни предмети и пиротехнички средства кон полицијата, по што полицијата одговорила со брутална сила, пишува „Ел Паис“.
Пожарникарите протестираа поради продолженото работно време, недоволната екипираност и недостигот на соодветна опрема и обука. Условите што ги имаат, како што тврдат, не само што ги загрозуваат нивните животи, туку и ја попречуваат „нивната способност да ја заштитат заедницата на која и служат“.