Алжирската крајбрежна стража застрела двајца туристи кои летувале во Мароко, а кои наводно залутале во водите на Алжир со нивните скутери. Билал Киси и Абделали Мершуер, двајцата француски државјани, починаа во четвртокот откако несакајќи залутале во алжирските територијални води во близина на одморалиштето на плажата Саидија, на североисточниот брег на Мароко.
Двајцата несреќни скутерџии, наводно, решиле да пливаат до брегот откако останале без бензин во самрак. Едниот испливал на мароканска плажа, додека другиот бил уапсен од крајбрежната стража која патролирала затворената граница на двете држави,
Двете нации имаат долга историја на тензии, поврзани со претензиите на Мароко за спорната Западна Сахара. Двете нации делат граница долга речиси 2.000 километри, што е извор на тензии од независноста од француската колонијална власт. Заедничката граница беше затворена во 1994 година од безбедносни причини, откако исламистичките милитанти извршија бомбашки напад врз хотел во историскиот марокански град Маракеш.
Пукањето предизвика гнев во Мароко, откако рибар објави снимка од безживотно тело кое плива во морето.
Мохамед Киси беше единствениот од групата четворица што се врати во Мароко, пренесува новинската агенција АФП, цитирајќи ги мароканските медиуми. „Се изгубивме, но продолживме додека не се најдовме во Алжир“, рече г-дин Киси, чиј брат Билал беше убиен. Тој рече дека групата исто така останала без гориво.
„Знаевме дека сме во Алжир бидејќи кон нас дојде црн алжирски гумен чамец“, а оние што беа на бродот „пукаа кон нас“, рече тој. „Фала му на Бога, не бев погоден, но го убија мојот брат и мојот пријател“, додаде тој.
Киси рече дека потоа се обидел да плива назад во Саидија и на крајот бил фатен од мароканската морнарица.
Портпаролот на мароканската влада одби да го коментира пукањето, велејќи за АФП дека тоа е „прашање на судството“.
Засега нема коментар од Алжир.