„Црн ден за израелската демократија“, со вакви написи исцртани со црно мастило осамнаа насловните страни на четирите водечки весници во Израел, ден по изгласувањето на Предлог-законот за ограничување на овластувањата на Врховниот суд од страна на Кнесетот.
По вчерашните протести низ земјата денеска на реформата се противат и илјадници офицери во воените резерви.
Поради измените одбиваат да се појавуваат на доброволна служба – удар што може да ја поткопа воената оперативната способност на земјата.
Аналитичарите стравуваат дека „ремонтот“ на судството може да ги разниша и врските со администрацијата на Бајден, откако од САД гласањето го оценија како „несреќно“.
Велат и дека ваквиот тек на настаните може да ги загрози новите сојузи со арапските држави и да го продлабочи конфликтот на Израел со Палестинците оценувајќи дека сега екстремни страни на политичката мапа стануваат уште поекстремни.
Групите за граѓански права поднесоа петиции до Врховниот суд со повик да се поништи новиот закон.