Тензична е утрово ситуацијата во општините со мнозинско српско население на северот на Косово. Единици на КФОР формираа кордон зад кордонот на косовската полиција во Звечан пред објектот на општината.
Утрово имаше обид на граѓани да влезат во општинската зграда, при полицијата користеше солзавец и ги спречи во намерата.
Како што јави РТС, вработените во неколку наврати се обиделе да го пробијат кордонот на специјалните единици на косовската полиција стационирани пред влезот на зградата.
Вработените во таа општина претходно беа пропуштени од војниците на КФОР, кои од утрово се распоредени пред општинската зграда, вооружени и со опрема да ги разбијат демонстрациите.
Претставниците на Српската листа, Горан Ракиќ, Игор Симиќ и Драгиша Миловиќ пристигнале пред зградата и разговараат со претставници на косовската полиција, јавува РТС.
Според косовскиот портал Kоха.нет, Ракиќ и Симиќ поставиле две барања за заминување на демонстрантите од зградата на општина Звечан, каде што се собраа да протестираат.
Нивните барања се отстранување на косовската полиција од областа и оставка на новиот градоначалник избран на изборите на 23 април.
Овие барања беа изнесени на нивниот состанок одржан со командантот на КФОР кој е таму.
Ситуацијата моментно е мирна и во Зубин поток. Пред општинската зграда се насобрани граѓани кои бараат да влезат внатре. Пред нив се полициски службеници во опрема за разбивање на демонстранти кои ги одвраќаат од намерата.