ВМРО-ДПМНЕ бара оставка и кривична одговорност од шефот на македонската дипломатија, Бујар Османи, бидејќи на официјалната прес-конференција со неговиот шпански колега зборувал само на албански јазик. Опозицијата тврди дека Османи со ваквиот недржавнични потег го прекршил уставот на државата, но и рамковниот договор.
Преку својот Фејсбук профил, Османи ја демантираше ВМРО-ДПМНЕ. Опозициските тврдења ги отфрли како груби лаги и целосно измислени факти, со кои како што пишува, се создаваат етнички тензии и општествени поделби. Сподели и видео од прес-конференцијата со шпанскиот министер, проследено со официјалниот демнат од МНР кој стигна неколку часа претходно, а во кој се негира кршење на Уставот и законот за јазици.
На секој настан Министерот се обраќа пред домашната јавност на двата службени јазици дефинирани според Уставот и Законот за јазици, при што Министерството обезбедува превод, соодветно достапен за присутните медиуми, стои во Соопштението од МНР.
Од таму ги повикуваат ВМРО – ДПМНЕ да ги поткрепат тврдењата со некаков доказ, запис или снимка; во спротивно, да покажат почит кон вредностите кои ги застапуваат и јавно да се извинат за непотребното создавање конфузија во јавноста на етничка основа.