Оризните ниви во кочанско поле почнаа да се полнат со вода. Сеидбата на оризот е во тек, а последните врнежи од дожд го промени планот за сеидба. Наместо 2.500, сега оризот ќе се сее на 3.500 хектари. Во браната Калиманци сега вода има, со што е почната наводнителната сезона.
„На самиот старт на сезоната за наводнување во акумулацијата Калиманци има околу 95 милиони кубна вода, што е за околу 20 отсто помалку од максималниот капацитет. Со добра организација , сметаме дека ќе успееме сезоната за наводнување да ја реализираме според планот“, информираат од Водостопанство „Брегалница“ – Кочани.
Оризопроизводителите велат дека подготовката на нивите им е отежната, поради тоа што нивите им се со кал, а во нив не можат да влезе земјоделската механизација. Дополнителен проблем им е тоа што се зголемени и трошоците за сеидбата.
Во моментов, оризовата арпа достигнува и цена од 38 денари, а кочанските оризопроизводители бараат нова производна цена.
Викторија Димитрова Јованова