ТикТок е на „стаклени нозе“ во САД и нејзината иднина во земјата во голема мера ќе зависи од исходот на сослушувањата во Конгресот. Мнозинство од американските конгресмени се залагаат за забрана на кинеската социјална мрежа, бидејќи ја сметаат како закана по безбедноста на САД.
ТикТок, која има 150 милиони американски корисници, се соочува со обвинувања дека дели нивни податоци со кинеските власти и оти не прави доволно за заштита на децата кои ја користат мрежата.
Извршниот директор на компанија, Шу Зи Чуа денеска одговараше на тешки прашања од американски конгресмени, меѓу кои најинтересно беше со републиканскиот конгресмен Бил Џонсон. Неговото сведочење доаѓа по една недела од напорите на кинеските власти да ги убеди Амерриканците оти нивната апликација носи економска вредност и ја поддржува слободата на говор.
Дел од политичките стручњаци веруваа дека забраната на ТикТок би можела да им наштети на Демократите кои ја користат платформата за обраќање до помладите гласачи.
Апликацијата е забранета на официјалните телефони на државни службеници и вработени во Велика Британија, како и во владини институции во САД, Канада, Нов Зеланд и Белгија. Слични забрани имаат и службениците и вработените во Европската комисија. Забраната не се однесува на личните мобилни телефони.
Идејата за забрана на ТикТок во Америка не е нова. Уште во август во 2020 година, тогашниот американски претседател Доналд Трамп ја објави забраната поради грижа за, како што рече тогаш, националната безбедност.
Сашко Димовски