Американската вселенска компанија „Релативити Спејс“ (Relativity Space) планира да лансира 3Д испринтана ракета „Теран 1“ од Кејп Канаверал, Флорида, прескокнувајќи ги планираните тестови со што таа ќе стане најголемиот тридимензионален печатен објект што ќе се обиде да лета во орбитата.
Ракетата е висока околу 35 метри, што ја прави една од најмалите орбитални ракети, а 85 отсто од масата е направена со помош на 3Д печатач. Таа има капацитет на носивост до 1.250 килограми во орбитата на Земјата, а компанијата наплаќа 12 милиони долари по лет.
Но „Теран 1“ на својот прв лет нема да носи никаков товар. Доколку стигне до вселената, летот ќе се смета за успешен. Компанијата одлучи да го прескокне последниот планиран тест (статичен оган), во кој ракетните мотори се палат додека ракетата е прикачена на земјата, и реши веднаш да продолжи со лансирањето.
Плановите на „Релативити Спејс“ се овозможување на изградба на индустриско општество на Марс, но нивната ракета е премала за да стигне до Црвената планета.