ЈП „Водовод и канализација“ лаже дека не побарало поскапување на цената на водата, вели претседателот на Регулаторната комисија Марко Бислимоски, тврди дека лани на 11 ноември претпријатието доставило барање за утврдување на тарифа за водна услуга потпишано од тогашниот в. д. директор Марјан Митовски.
„Еве ги барањата кои ги доставија до нас за нови тарифи за водоснабдување, собирање и одведување на отпадни води и прочистување на отпадни води. Ние одлуката на подготвителната седница ја донесовме врз база на овие барања. Ако не сакаат да поскапи водата како што велат сега, нека ги повлечат барањата. Ама бидејќи не знаат што сакаат и лажат, ние конечна одлука нема да донесеме“, вели Бислимоски.
Претходно, од скопски водовод испратија реакција, која според претријатието е демант. Велат дека не е точно дека цената на водата ќе поскапи. Но, потврдуваат дека испратиле известување за зголемени трошоци на претријатието по основ на електрична енергија.
Во согласност со Законот за утврдување цени на водните услуги се доставува известување за зголемените трошоци на претпријатието по основ на електрична енергија и енергенси во форма на барање за утврдување на тарифите за водните услуги, барање кое е доставено во 2022 година, се вели во реакцијата. И додаваат дека поскапување на водата нема да има.