Стотици српски граѓани се собраа во Белград, барајќи претседателот Александар Вучиќ да го отфрли планот на Западот за нормализирање на односите со отцепеното Косово и да се повлече од преговорите.
Извикувајќи „Предавство“ и носејќи транспаренти на кои пишува „Нема предавање“, десничарските демонстранти го блокираа сообраќајот додека се собираа во близина на зградата на српското претседателство во центарот на главниот град.
Протестот доаѓа во време кога претставниците на САД и Европската унија посредуваат во изнаоѓање решение за долгогодишниот спор меѓу Србија и Косово, поранешна српска покраина чијашто независност прогласена во 2008 година, Белград не ја признава.
Западот стравува дека Русија би можела да ги искористи тензиите во Косово за да се обиде да го дестабилизира Балканот и да оттргне внимание од инвазијата на Украина.
Српскиот претседател Александар Вучиќ пак претходно изјави дека е подготвен да го разгледа планот на Западот.
Неговите одредби не се објавени, но, наводно, предвидува дека Србија нема да се противи на членството на Косово во меѓународните институции, вклучително и Обединетите нации.