Сега се дома покрај своите семејства сите деветмина македонски државјани кои беа затекнати во Турција за време на земјотресот. Осумте средношколци и нивниот наставник-ментор се во добра здравствена состојба.
Таткото на 17-годишниот Шкмбор, Ајет Беџети од Тетово, вели дека за земјотресот дознал од медиумите, по што во комуникација со другите родителите, разбрал дека децата се живи. Неговиот син се здобил со многу лесна повреда од стакло при бегање од гужвата, но траумите од доживеаното се многу поголеми.
„Тој немаше ништо, кажува дека над глава му паднале ситници од прозорци. Паника голема има, и кога одмара малку, леле татко не ми излегува од мисли, после муабетот- како што сум гледал“, вели Беџети.
Освен од Тетово имаше и ученици од неколку места во општина Маврово -Ростуше, кои утрово пристигнале со автобус во Гостивар. Џевад Сефери, родител на едно од децата, вели дека Амбасадата многу помогнала децата да бидат безбедни и да се вратат во земјава. Ги извлекле од градот каде престојувале Кахраман Мараш, со возила до Анката од таму до Истанбул па до Македонија.
„Гледавме на интернет, знаевме каде се наоѓаат децата, првично контактиравме со Амбасадата, зашто во градот немавме контакт со децата, потоа добивме информација од едно од децата дека сите се живи, здрави, добри се и така цел ден контактиравме со Амбасадата постојано, тие излегоа многу во престер ги извлекоа децата и ги вратија дома“., вели Џевад Сефери, родител.
Учениците и нивниот ментор за Турција заминале на 3 февруари, преку Еразмус плус програмата.
Данијела Билбилоска