Со парична помош и донации од луѓе и фирми ќе помага нашиот Црвен крст за последиците од разорниот земјотрес во Турција.
Ова е првична помош, вели генералниот секретар Саити.
Светот денес сведочи на хорор-фотографии и видеа, збришани цели населби и градови, а бројот на загинати расте од секунда во секунда.
„Како Национално друштво, првично се договоривме да ги отвориме нашите инструменти кои редовно ги користиме во вакви ситуации, а тоа се: нашата солидарна жиро-сметка или Фондот за солидарност со кој прибираме средства од правни лица и од заинтересирани граѓани, потоа сметката за девизни донации доколку тие доаѓаат од странски компании од земјата и странство, а во функција е ставен и единствениот телефонски број 143-400 на двата мобилни оператори, каде што со секој повик може да се донираат 100 денари“ вели Д-р Саит Саити, генерален секретар на Црвениот крст во РС Македонија.
Додека земјата се тресе, во реално време пристигнуваат информациите на компјутерите во Сеизмолошката опсерваторија. Детал по детал, стручните лица – сеизмолози ги прибираат информациите.
Веќе мапирале каде и што се случува и каде сѐ се затресе земјата.
Смируваат — директна опасност на територијата на Македонија од овие земјотреси – нема, но секогаш онаму каде што имало земјотреси, повторно ќе има и прашање е кога ќе се случат истите.
„200 километри изнесува максималната линеарна димензија на активниот дел од раседот каде што се случи земјотресот во 04:17 часот, со магнитуда 7,8 степени според Рихтеровата скала. Бидејќи земјотресот е исклучително силен, тоа ќе има одредено влијание на околните тектонски блокови меѓутоа тоа не оди така брзо туку потребно е некое време за да настане распределба на овие напрегања“ изјави Проф. Д-р Драгана Черних, раководител на Сеизмолошката опсерваторија при ПМФ – Скопје.
Професорката Черних вели дека земјотресите се најдобар ревизор за квалитетот на градбата и јачината на објектите. Истото го анализираат и во Институтот за сеизмички градби и климатски промени.
Градежниот инженер Михаил Гаревски порачува дека во Македонија не треба да се стравува од разорни последици по скопскиот земјотрес во 1963 година и законските измени оттогаш.
Објектите, генерално ги задоволуваат параметрите и стандардите.
„Тоа во 1963 година навистина беше катастрофа и несреќа. Оттогаш па наваму исклучително се внимава на градбите во Македонија. Би сакал да истакнам дека во последните можеби десетина години ние имаме едни од најсигурните градби дури и во Европа затоа што имаме многу ригорозни контроли. Најрпво се контролира проектот, тогаш се дава градежна дозвола и повторно за истиот објект се оди двапати на терен за да се види дали се постапува спрема проектот“ смета Михаил Гаревски од Институтот за сеизмички градби и климатски промени.
Раседите во Македонија можат да генерираат земјотреси околу скопското епицентрално подрачје до 5 или 6 магнитуда и ваков разорен земјотрес не треба да се очекува овде, додека пак на истокот на земјата може да се очекува и поголема магнитуда од тоа.
Петар Догов