Има линии на автобуси што воопшто ги нема, а оние кои возат се многу ретки, се жалат граѓаните. Премрзнати чекаат и со часови на автобуските постојки, а тоа им прави дополнителен проблем затоа што доцнат на своите работни места, училишта и домови. Бараат надлежните час поскоро да ја решат оваа состојба.
За приватните превозници оваа безизлезна ситуација трае предолго. За вторник веќе пријавиле протест и нови блокади кај Автокоманда, Веро Џамбо и мостот Обединети нации. Но, утринава одлучија да го стават протестот во мирување, бидејки добиле ветување – утре ќе седнат на маса со градоначалничката Арсовска. Оваа средба во град Скопје за Телма ја потврдија и од кабинетот на Арсовска.
Но, пред само неколку дена првиот човек на градот беше дециден дека средба нема да има.
По ова, вработените одлучија дека треба да изберат ново тело за преговори, во кое нема да бидат првите луѓе на „Слобода превоз“ и „Макекспрес“ Ленин Јовановски и Милорад Димитриевски.
Ни на денешниот протест не дојдоа директорите на „Слобода превоз“ и „Макекспрес“ кои со месеци им даваа поддршка на превозниците и ги водеа преговорите за да им се исплати милионскиот долг. Утрешната средба во градот Скопје ќе одлучи дали во вторник скопјани ќе се соочат со нови блокади.
Симона Петровска