Никакви лоши статистики ниту гласни апели од надлежните, не ја сузбиваат скепсата кон вакцинацијата кај населението.
Опасноста од зараза со мали сипаници виси над регионот. Србија, Црна Гора и други држави се пред прогласување на епидемија. Ниту Македонија не е далеку од тоа.
Второто полугодие започна, со тоа се зголеми и опасноста, а процентот на вакцинација каска зад потребниот опфат, за да бидеме безбедни од повторно враќање на заразата.
„За да бидеме заштитени, процентот на вакцинирани треба да изнесува 90 до 95 отсто, а ние ги гледаме какви се бројките. На територија на целата држава во 2021 година опфатот на вакцинација изнесува 70,4% со прва доза, а со втора доза 80,4%. Овие проценти директно доведуваат до опасност од појава на морбили. веќе постојат регистрирани случаи во соседна Србија и поради блискоста во регионот и други фактори, постои опасност од појава на морбили и во нашата држава“ изјави Д-р Соња Ралева, специјалист по општа медицина во ЈЗУ Здравствен дом – Скопје.
Доктор Ралева вели дека има активности како „Недела на имунизација“, но никогаш не е доста од јавни кампањи.
Населението одбива, а парадоксот на статистиките е што големите градови убедливо губат од селата и помалите места кога станува збор за опфатот на имунизација, иако нема никаков доказ дека вакцините се штетни.
Оние кои не учеле медицина се прават поголеми доктори од докторите, а зошто е тоа така – анализира микробиологот Никола Пановски.
„Уште поголема е скепсата од вакцинација дури и за овие докажани вакцини како што е вакцината против морбили, особено кај „интелектуалните кругови“. Таму степенот на вакцинација е обратнопропорционален со образованието на граѓаните. Општината каде што јас живеам и општината преку улица – тоа се Центар и Карпош, тогаш кога беше епидемијата на морбили имаше најмал опфат на вакцнирани деца, а тие се сметаат како најинтелектуални општини“ смета проф. д-р Никола Пановски, микробиолог.
Во 2019 година беснееше епидемија на мали сипаници низ Македонија. Тогаш, Институтот за јавно здравје запиша 1.901 заразен, а четири деца починаа од последиците.
Петар Догов