По рекордите што Македонија ги рушеше во загаден воздух, сега сме во топ 10 во светот и според бројот на пушачи и вкупниот број на испушени цигари. Анализите покажуваат дека, речиси, половина од возрасните луѓе во Македонија користат тутун. Но, рекордот не го држиме само во зголемениот број на пушачи, Македонија е држава и со најниски цени на цигари во регионот.
Според Аналитика, еден од факторите за да се намали пушењето е враќање на примената на законот од 2010 година, во кој целосно се забрануваше пушење во затворени простории.
Додека светот ги затега забраните за пушење, во Македонија чадот од цигарите го има насекаде. Миризба и чад во, речиси, секој угостителски објект, откако газдите решија да го изиграат и да профитираат од законот за заштита за пушење.
Македонија на хартија има релативно добар закон, каде се забранува пушење во сите јавни простории. Но, законот дозволуваше само надвор од објектите, на терасите или летните бавчи. Проблемот настана во 2018 година, кога на власт дојде владата на СДСМ и го тргна членот од законот во кој јасно се дефинираше што е тераса, односно каде смее да се пуши.
Затоа во изминатите пет години, секој слободен простор од угостителскиот објект стана тераса или летна бавча, која во зима е целосно затворена со метални конструкции и стакла и буквално е споена со останатиот дел од објектот. Ова практично значи дека целиот простор е исполнет со чадот на тие што пушат цигари, а летните тераси ги „избркаа“ непушачите од рестораните и кафулињата.
Симона Петровска