Дали доколку се раскине Договорот со Бугарија, ВМРО-ДПМНЕ ќе дадат поддршка за уставни измени? Мицкоски не одговори директно на прашањето на денешниот брифинг со новинарите, но навести таква можност велејќи, „ајде да успее референдумот, па прашајте ме повторно„.
Мицкоски тврди дека тие не се против тоа Бугарите да бидат дел од Уставот, но потенцира дека, доколку остане вака како што е, тие треба да се случат на крајот од преговарачкиот процес, а не на почетокот. Со измени на почетокот, Договорот ќе стане легитимна алатка за понатамошни блокади.
Референдумското прашање, „Дали сте за напуштање на важноста на Законот за ратификација на Договорот за пријателство, добрососедство и соработка меѓу Република Македонија и Република Бугарија“ е срочено токму така за да не му се даде алиби на собранискиот спикер да го опструира во собраниската процедура и затоа што сметаат дека овој Договор е изворот на сите проблеми. Мицкоски тврди дека со неговото раскинување преговарачката рамка не станува беспредметна, туку само од неа се вади членот 5 алинеја 4.
Повика на семакедонско обединување, затоа што, како што вели, ова е најголемиот тест за македонскиот народ во поновата историја. Кампањата ќе се води под слоганот„Излези за Европа-не за асимилација“.
Но, претседателот на државата и премиерот сметаат дека референдумот е антиевропски. Зачудени се и од референдумското прашање и од најавата за можни уставни измени доколку се раскине Договорот со Бугарија.
Стоте потребни потписи за референдумот, кој ќе биде задолжителен, ќе бидат депонирани во ДИК утре напладне, а во петок иницијативата ќе се достави до Собранието, по што спикерот ја доставува до собраниските комисии. Со ова почнува процедурата за собирање на 150 илјади потписи, а очекувањата се дека референдумот би се одржал напролет.
Далиборка Демјанска Цветановска