Условни казни за Владимир Тодоровиќ и неговата сопруга кои се спогодија со Обвинителството . Како што објави „Призма“ на БИРН тие беа обвинети за лажно сведочење на судењето за предметот „Талир“, во кој Никола Груевски, Кирил Божиновски, Миле Јанакиески, Илија Димовски, Леко Ристовски и Елизабета Чингаровска се обвинети за незаконско стекнување на пет милиони евра за ВМРО-ДПМНЕ.
Тодоровиќ кој беше градоначалник на Центар и неговата сопруга беа обвинети дека на друга жена-сведок во случајот и дале две страници отчукани на латиница со исказ кој требало да го употреби и прочита на суд, а е спротивен на исказот даден во истрагата на СЈО, објави „Призма“.
Истрагата и предметот се однесуваа на парите, наводно партиски донации, кои биле испрани преку уплатници со ист ракопис што ги пополнувале во име на партиски членови, без нивно знаење.
Две години условна казна доби Тодоровиќ а неговата сопруга шест месеци. За лажен исказ за што беше обвинет бизнисменот (член 367 став 4, алинеја 3 од КЗ) е предвидена затворска казна од минимум 4 години затвор, а за попречување на правдата дело за кое беше обвинета неговата сопруга, казната е од една до 5 години затвор (член 368-а, став 1 од КЗ на РСМ).
Одлуката за спогодба со признание на вина е склучена на 1-ви јули.