Досегашниот државен секретар во Министерството за надворешни работи, Зоран Попов, како предлог за амбасадор во САД го помина филтерот на Собранието.
Пред членовите на Комисијата за надворешна политика, на затворена седница, поради информации од доверлив карактер, Попов ги презентираше своите тези за дипломатската мисија во САД.
Попов ќе го пополни испразнетото амбасадорското место во САД по повеќе од четири години пауза од заминувањето на претходниот амбасадор Васко Наумовски.
Помеѓу новите амбасадори, кои пред Комисијата треба да ги претстават своите тези се и новите амбасадори во Канада – Агрон Буџаку (поранешен амбасадор во Франција и екс директор на ЦУК), во Кралството Норвешка, Дритон Куќи, во Словачка – Евгенија Илиева и во Кралството Белгија, Методија Белевски.
МНР информира дека за уште тројца амбасадори се добиени агремани и во тек се нивните подготовки за преземање на должноста и барањето до Собрание за закажување на седница на Комисијата за надворешни работа.
Актуелниот директор на тајната служба АНБ Виктор Димовски ќе биде амбасадор во Франција, додека жешкото столче во Софија треба да го преземе Агнеза Руси. Поранешниот министер за одбрана Јован Манасијевски ќе биде нов амбасадор во Турција.