Општина Делчево го објави Конкурсот за доделување стипендии за упис на додипломски студии во академската 2022/2023 година на Универзитетот за туризам и менаџмент во Скопје, кои ќе важат за период од четири години заклучно со 2026 година.
-Универзитетот за туризам и менаџмент во Скопје, доделува 15 стипендии во износ од вкупно 7000 евра, од кои во прва година стипендиите се во вредност од 1000 евра, а во втора, трета и четврта година по 2000 евра. Стипендиите важат за запишување на Факултет за туризам, Економски факултет, Факултет за меѓународен маркетинг менаџмент, Факултет за менаџмент на човечки ресурси и Факултет за информатика, информираа од Општината.
Согласно со јавно објавениот Конкурс, право за конкурирање имаат сите средношколци кои завршиле средно образование во СОУ „Методи Митевски Брицо“ Делчево и се жители од Општина Делчево и државјани на Република Северна Македонија.
-Предност во доделувањето на стипендиите ќе имаат одлични ученици, ученици од социјално загрозени семејства, ученици кои се деца без родители и ученици од ранливите категории граѓани, додадоа од Општината.
Конкурсот е отворен до 3 август оваа година, а повеќе информации за потребните документи се објавени на општинската веб-страна.