Сите гласаа „за“ поддршка за зачленувањето на двете скандинавски земји Шведска и Финска во НАТО на собраниската комисија за надворешна работа.
Едногласни беа пратениците и од власта и од опозицијата, оценувајќи дека станува збор за две пријателски земји кои отсекогаш и давале поддршка на Република Северна Македонија од нејзиното осамостојување, како и за нејзините евро-атлантски аспирации.
Според пратениците од опозицијата, со членството на Шведска и Финска во НАТО ќе се зајакне безбедносната архитектура во Скандинавскиот дел на Европа и тоа ќе претставува додадена вредност за Алијансата.
Пратеничката Соња Мираковска, од НСДП, поддржувајќи го потпишувањето на протоколите, изрази надеж дека утре тие едногласно ќе поминат и на пленарната седница.
Шведска и Финска со децении се неутрални држави и беа надвор од воените блокови на граница меѓу НАТО и Варшавскиот пакт. Воената неутралност ја задржаа и по распадот на источниот советски блок, но по агресијата на Русија врз Украина во февруари оваа година, двете држави го сменија ставот и побараа членство во Северно-атлантската алијанса.