Во Софија, меѓупартиските разговори за развојот на односите со Македонија и шансите за кревање на ветото, не ги организира претседателот Румен Радев туку премиерот Кирил Петков. Тој закажа состанок на Коалицискиот совет на кој се очекува да им објасни на партнерите во Владата како течат преговорите и зошто побарал претседателот да го свика Советот за национална безбедност. Радев не гледа причина за таков состанок, со став дека „не треба да има пазарење за човекови права“. Има поддршка кај дел од владеачките партии, кои немаат единствен став по прашањето на Македонија. Партијата на Слави Трифонов нагласува дека ќе го сослуша Петков но нема намера да го смени ставот, како и социјалистите кои ниту гледаат напредок во разговорите ниту причина за тргање на ветото. Некои изразија сомневање дека Петков е подготвен на отстапки, а тој возврати дека сам не би можел да донесе одлука поинаква од резолуцијата на Народното Собрание, бидејќи е неопходен широк консензус.
Недостигот од напредок го потврдуваат и Скопје и Софија. Премиерот Ковачевски вели дека `се уште нема заеднички прифатлив договор и дека по прашањето за почеток на преговорите со ЕУ, не сака да се врзува со датуми.
Лидерот на опозицијата Христијан Мицкоски повторно го повика Брисел да изврши притисок врз Бугарија. Смета дека европските земји „како што се обединија против војната во Украина, така треба да се обединат и против политичката агресија што Бугарија ја врши врз Македонија“.
И еврокомесарот за проширување, Оливер Вархеји, минатата недела ги повтори своите очекувања Бугарија да даде зелено светло за преговори со Македонија пред европскиот самит во јуни.
До сега, такви најави нема. Отворените прашања не беа затворени ниту во Рим, на средбата на премиерите Ковачевски и Петков, кои ги предводеа делегациите на одделното чествување на празникот Кирил и Методиј.
Соња Николовска