Ставот на владата околу укинувањето на одредбите од страна на Уставниот суд за висината на платите на јавните функционери е јасен. Владата има дадено негативно мислење, испратено до Уставен суд во кое едноставно укажува дека не треба да се прифати иницијативата и да остане на претходните одредби, изјави во вечерашното издание на Вин-Вин, вицепремиерот за економски прашања, Фатмир Битиќи.
Во однос на можноста владата со закон да го спречи енормното зголемување на платите со закон, Битиќи вели дека тој би требало да биде усвоен во Собранието, оценувајќи дека при тоа треба да се избегне да се направи штета на целокупниот систем.
„Со одлуката не се опфатени само министрите, не се опфатени само пратениците, опфатени се и судии и други именувани лица и нагоре во хиерархијата и надолу во хиерархијата. Јас само што завршив со економско-социјалниот совет заедно со министерката за труд и социјална политика, на кој што дискутираме за општиот колективен договор во целиот јавен сектор и кажав: „Ако се согласиме со синдикатите, методологијата за јавниот сектор ќе ја реплицираме и за избраните и именуваните лица.“ – изјави Битиќи, додавајќи дека доколку плататата на вработените во јавниот сектор биде поврзана со минималната плата, тој принцип може да се применува и на носителите на јавните функции.
„Сакаме да го финализираме сега, во месец Април, за да веќе со следните плати и секако ако е потребно после тоа дури и законски измени, да ги предложиме, затоа што ќе дадеме предлог, во кој што вистински ќе сакаме да најдеме решение кое што е одржливо.“ – вели Битиќи.