Организацијата на потрошувачи е на став дека мерката „гарантирана цена“ требало да важи до есен или барем до крајот на оваа година. Со падот на оваа мерка, до нив веднаш стигнале повици од граѓани за регистриран раст на цените кај одредени производи. За листата со над 2.500 продукти кои се планира да бидат со маржи до 10 отсто, сè уште не се исконтактирани од Министерството за економија и истата ја немаат добиено, но се надеваат дека истата ја работеле со стручни лица.
Денеска, во дел од маркетите, граѓаните забележале дека има скок на цените и тоа кај некои видови јогурт, кашкавал, сирење, паштети, шеќер, но и месо. Кај млечните производи поскапувањето е до 20 отсто. Но, статистика денеска измери инфлација од скромни 3 проценти.
Од друга страна, откако падна „гарантирана цена“, пазарниот инспекторат нема можност да делува. Ако има драстичен скок на цените, Комисијата за заштита на конкуренцијата да постапи и требаат цврсти докази, но постапките се долги, а Законот за нефер трговски практики кој треба да стави ред е низ собраниските лавиринти.
Затоа дел од синдикатите апелираат до трговците да бидат совесни, падот на инфлацијата го врзуваат со светските берзи, но и со мерките.