Возачките, сообраќајните дозволи и патните листи од утре ќе бидат бесплатни. Исто како и издавањето на патните листови за оние што живеат надвор од државата, а имаат потреба да се вратат во земјава за да извадат нова патна исправа.
Битиќи вели дека за оние кои веќе извадиле документи оваа одлука е дискриминирачка и на владина седница се разговарало за ова и се очекува во наредниот период да се најде решение и за нив.
Втор ден како граѓаните доаѓаат во станиците за технички преглед по налепници. Телма направи обиколка во неколку станици. Во дел од нив веќе е потрошена доставената количина и очекуваат нова, некаде пак воопшто не се ни стигнати. Граѓаните сметаат дека во оние технички станици каде што има доволно налепници процедурата оди брзо.
„Земав налепница. Не чекав многу, некои 15 минути и веднаш не услужија“, вели еден граѓанин.
„Го чекам полицаецот од МВР за да ми издаде сообраќајна. Постапката оди брзо, дојдов во период кога нема гужва“, вели друга граѓанка.
„Нема налепници уште не се стасани, велат дека до 11 требало да стигнат, но еве веќе помина 11 и уште ги нема“, вели државјанин.
Дел од транспортерите велат дека краткиот рок за исполнување на условите кои произлегуваат од Преспанскиот договор кај нив предизвикал колабс во работењето. Здружението на превозници Кипери велат дека поради тоа нивните возила од денеска остануваат паркирани.
„За една налепница треба да одиш во техничка станица и таму да ја залепат под видео надзор. Тоа е страшна работа“, изјави Трајче Пејовски, претседател на „Кипери”.
350.000 налепници се дистрибуирани до станиците за технички преглед. Од Министерството за внатрешни работи немаат точна бројка за колку возила се потребни налепници. Вчера, во последен момент Собранието го измени законот со кој возачките дозволи со старото име на државата ќе важат до нова година, но само внатре во државата.
Од станиците за технички преглед велат дека имаат доволно обрасци за сообраќајни дозволи со новото име. Од денес оние кои немаат налепница НМК нема да можат да ја напуштат државата.
Тамара Марковска