Собраниската Комисија за прашања на изборите и именувањата денеска на седница се очекува да расправа по единствената точка на дневен ред – утврдување на предлог за избор на судија на Уставен суд.
За уставен судија, според материјалите објавени на веб-страната на Собранието, е предложена универзитетската професорка Ана Павловска Данева.
На првата седница за оваа точка одржана на 25 јануари не беше утврден дневниот ред.
Пратениците од ВМРО-ДПМНЕ побараа појаснување зошто е повлечен претходниот предлог за уставен судија, односно Љубомир Јовески да биде уставен судија.
Воедно посочија дека со новиот предлог за судија не се запазени важни услови.
Првиот е да има департизација, тоа значи тој што е судија да нема политичка активност или политичка определба.
Предлогот Данева да биде нова уставна судијка дојде откако на 24 јануари во Собранието по речиси година и половина расправа беше повлечен предлогот за Љубомир Јовески да биде уставен судија.
Тој тогаш изјави дека изненадувачки и вулгарно било тоа предлогот да биде повлечен без да се наведат основни причини за тоа поради што му била нанесена штета.
Уставниот суд подолг период работи во некомплетен состав, бидејќи постапката за избор на нови членови заглави во Собранието.