Иранската влада за денеска свика итен состанок по смртта на иранскиот претседател Ебрахим Раиси и министерот за надворешни работи на земјата Хосеин Амир Абдолахиан во хеликоптерска несреќа, јави иранската државна новинска агенција ИРНА.
Според фотографијата што ја објави агенцијата, столицата на која обично седи Раиси е празна и покриена со црна лента во спомен на претседателот.
Иранските државни медиуми емитуваат исламска молитва меѓу извештаите за смртта на Раиси и уште осум други лица откако хеликоптерот со кој патуваа се урна во иранската провинција Источен Азербејџан.
На профилот на Раиси на Х се објавени стихови од Куранот.
„Мир со Ебрахим. Навистина, така ги наградуваме оние што прават добро. Тој беше еден од нашите верни слуги“, се вели во стиховите од Куранот на профилот на Раиси.
Раиси беше втората најмоќна фигура во политичката структура на Иран по врховниот лидер ајатолахот Али Хамнеи.
Иранскиот претседател Ебрахим Раиси и други официјални лица се пронајдени мртви на местото на хеликоптерската несреќа по повеќечасовна потрага низ маглив, планински регион во северозападниот дел на земјата, објавија државните медиуми.
Раиси имаше 63 години. Меѓу загинатите е и иранскиот министер за надворешни работи.
Во хеликоптерот се наоѓал и гувернерот на иранската провинција Источен Азербејџан и други службеници и телохранители, објави државната новинска агенција ИРНА. Несреќата се случи во моментот кога Блискиот Исток останува немирен поради војната меѓу Израел и Хамас, за време на која Раиси под водство на врховниот лидер ајатолахот Али Хамнеи изврши невиден напад со беспилотни летала и ракети врз Израел.
Под власта на Раиси, Иран збогатуваше ураниум до ниво на производство на нуклеарно оружје, дополнително ескалирајќи ги тензиите со Западот, бидејќи Техеран, исто така, испорачуваше беспилотни летала со бомби на Русија за нејзината војна во Украина и вооружени милициски групи низ целиот регион.
Меѓувреме, Иран се соочи со години на масовни протести против својата шиитска теократија поради неговата слаба економија и правата на жените – што го прави моментот многу почувствителен за Техеран и иднината на земјата.