Рускиот претседател Владимир Путин истакна дека Москва е подготвена да биде посредник во решавање на израелско-палестинската криза. На самитот на Заедницата на независни држави во Бишкек, шефот на руската држава рече дека е неопходно да се бара мировно решение на конфликтот и оти едноставно не постои алтернатива, пренесува РИА Новости.
„Загубите меѓу цивилите се апсолутно неприфатливи. Сега е најважно да запре крвопролевањето“, изјави Путин.
Рускиот претседател го повтори ставот дека заострувањето на ситуацијата на Блискиот Исток е последица на неуспешната политика на САД која, како што оцени, не се обиде да бара начини за „пеглање“ на противречностите меѓу двете страни.
„Блискоисточниот квартет на меѓународни посредници не е употребен. Под измислени изговори САД го блокираа тој формат кој единствен имаше мандат кој е одобрен со релевантна резолуција на Обединетите Нации“, рече Путин.
Путин смета дека бил направен обид со одредени економски поттикнувања да се реши политичкиот проблем, кој е длабоко вкоренет, а тоа е создавање на независна палестинска држава.