Американската политика кон Западен Балкан се базира на едноставен принцип: да продолжи интеграцијата на регионот во евро-атлантските структури. На дебатата за Западен Балкан пред поткомитетот за надворешна политика на американскиот Конгрес уште еднаш беше повторен ставот дека останува американската поддршка за промена на Уставот, како услов за да продолжат македонските евроинтеграции.
„За да ги продолжи своите аспирации за Европската Унија, владата на Северна Македонија се обврза да донесе уставни измени за признавање на бугарското малцинство. Силно го поддржуваме овој тежок, но неопходен чекор“, изјави Габриел Ескобар, заменик помошник државен секретар за европски прашања.
Ескобар додаде дека САД се ангажирани и со новата влада на Бугарија за да се осигура дека нема да поставува нови барања, откако Македонија ќе ги исполни своите обврски од постоечките договори. Во неговото сослушување во Претставничкиот дом на конгресот кое траеше речиси час и половина, Ескобар зборуваше и за Европа на две ленти.
„Ќе биде грешка да се гледа Западен Балкан како единечна целина. Имаме три земји од Западен Балкан кои побрзо напредуваат кон ЕУ и кои не случајно се членки на НАТО. Тие ги подржаа нашите напори за регионална стабилност и не само регионална, туку и европска стабилнсот. Тоа се Црна Гора, С. Македонија и Албанија. И блиску соработуваме со нив“, истакна Ескобар.
Американската политика кон Западен Балкан е важно прашање за Конгресот. Иако во прашањата доминираше ситуацијата на Косово и кризата во Босна и Херцеговина, оценката е дека членството во Унијата е неопходност за регионот.
„Членството во Евроопската Унија за Северна Македонија и Албанија ќе бидат додатна сила на транс-атлантското сојузништво и ги охрабрувам европските земји кои се противат да ги признаат овие реформи и компромиси во Северна Македонија и Албанија. Да се осигураат и да ги признаат дејствата што ги презедоа и да го придвижат процесот напред. Тие заслужуваат пристапување“, вели конгресменот Бил Китинг.
Китинг рече и дека САД треба да направат сè што е во нивна моќ заедно со европските партнери да го поддржат демократскиот развој, владеењето на правото и заштитата на човековите права на Балканот.
Марија Дивитарова