Француската премиерка Елизабет Борн се состана со партиските лидери од францускиот Сенат и Националното собрание за да разговараат за прашањата што произлегоа по неколкудневното насилство во земјата.
По серијата состаноци, Борн им рече на новинарите дека се покренати клучните прашања за градските политики, улогата на училиштата и родителската одговорност.
Борн истакна дека приоритет е враќањето на безбедноста и редот, а разгледани се и низа други прашања кои понатаму ќе се разговараат меѓу политичкото раководство.
Насилствата во земјата отпочнаа откако минатиот вторник беше застрелан 17-годишниот Нахел во париското предградие Нантер.
Гневот најмногу се манифестираше кај младите луѓе кои се свртија против полицијата, при што двете страни користат сè поагресивни тактики.
Просечната возраст на 3.354 лица уапсени во текот на изминатата недела беше 17 години, соопшти француското Министерство за внатрешни работи.