Специјалната известувачка за Косово во Европскиот парламент, Виола фон Крамон ги повика властите во Приштина да ги повлечат специјалците од северот на земјата и да седнат на преговарачка маса.
Спордд неа, ситуацијата на Косово е единствено можно да се реши преку дијалог и на конструктивен начин и додаде оти владата во Приштина презема голем ризик со потезите.
„Дали ова е облик на „добро“ управување што го сакаме? – Наместо тоа, би требале да имаме повеќе мерки за градење на доверба. Внатрешниот дијалог во Косово е единствен излез од оваа ситуација. Ги повикуваме косовските власти да размислат за преземање на мерки за градење на доверба. Како на пример, повлекување на специјалните полициски сили од северот и седнување на преговарачка маса“, порача Фон Крамон.
Таа најави оти наскоро ќе го посети Косово поради презентација на Извештајот на европскиот парламент за земјата. Фон Крамон упати честитки до Косово за визната либерализација и трудот на властите во Приштина што е вложен во борбата против организиран криминал и корупција.