Тројца млади моторџии заглавиле во кал на непозната локација на планината Плачковица. Последен контакт со групата со која возеле имале синоќа во 19 часот. Во потрагата се вклучија планинари, полицијата и од 20 до 25 луѓе од семејствата на исчезнатите моторџии. Потрагата заври утринава околу 7 часот, кога е воспоставен контакт со нив.
„Според последните информации добиено од РЦУК Штип, едното од изгубените лица во 6:58 часот воспоставило контакт со член на фамилија и известил дека трите лица со моторите се заглавени во кал, па ноќта ја поминале на планината Плачковица и дека се во добра здравствена состојба“, се вели во соопштението од ЦУК.
Планинарот Мартин Каровски вели дека убаво е да се шета низ планините и во природа. Но, секогаш треба да се знае иако е пролет, на планините температурите и условите за неколку минути стануваат зимски. Мора и да се биде психо-физички подготвен, со знаење како да се движиш низ планината и секогаш да ја имаш во предвид временската прогноза.
Каровски посочува дека во планина не треба да се оди сам, пожелно е во групата да се има лиценциран водич или искусен планинар.
Според податоците на планинарите во текот на годината вакви потраги по исчезнати лица низ планините Осогово и Плачковица имаат од 10 до 15 случаи.
Викторија Јованова Димитровска