Меѓународната заедница мора да почне да создава услови за враќање на мировните преговори за ситуацијата во Украина, изјави шефицата на француската дипломатија, Катрин Колона во интервју за телевизијата НХК, за време на состанокот на министрите за надворешни работи на групата седум (Г7) најразвиени земји.
„Неопходно е да се започне со работа за создавање на услови за мирен дијалог. Одговорноста за тоа лежи на сите држави“, рече Колона, признавајќи притоа дека во овој момент не постојат услови за мирни преговори со Русија.
Колона потсети дека земјите од Г7 се едногласни по прашањето дека е неопходно да се побара повлекување на руските војници од Украина, но истовремено да се отвори пат за почеток на мировни преговори.
Француската министерка, исто така, изрази уверување дека Кина размислува да испрати сигнал до Русија дека треба да го почитува меѓународното право, кога станува збор за ситуацијата во Украина. Таа, како што нагласи, станало можно по неодамншената посета на претседателот Емануел Макрон на Пекинг.
„Мислам дека Кина почна подобро да ја разбира нашата позиција“, додаде Колона.
Јапонија го презема претседавањето на Г7 за 2023 година. Генералниот секретар на јапонската влада, Хирокацу Мацуно уште во јануари порача дека Јапонија, како претседавач со Г7, ќе инсистира на воведување на санкции за Москва и помош за Киев. Премиерот Фумио Кишида рече дека светот на „пресвртна точка“ поради пандемијата на коронавирус и војната во Украина кои го „тресат светскиот поредок до темел“, пренесува „Спутник“.