Вакцината БСЖ кај нас, која се дава на бебиња е безбедна и ги задоволува сите стандарди и спецификации. Одобрена е од Агенцијата за лекови и строго контролирана.
Здравствените власти смируваат – не постои опасност, ниту потреба да се повлече БСЖ-вакцината како што тоа е случај во соседна Србија.
Таму се повлечени 834 ампули од овој медицински препарат. Јавноста и родителите се во паника, нема информација колку бебиња се имунизирани со вакцина од оваа серија и веќе бараат здравствените власти да испратат инспекција кај производителот.
Вакцината е произведена во Институтот за вирусологија, вакцини и серуми „Торлак“.
„Во нашата држава се користи БСЖ вакцина од производителот „Булбио“ од Република Бугарија“ , соопштија од МЗ.
Српските медиуми информираа за повлекувањето на овој тип на вакцина од здравствените установи. Станува збор за една серија од произведената вакцина, а повлечена е од целата територија, информираше Министерството за здравство на Србија.
Причината е минимално отстапување од строгите барања на спецификацијата на лекот.
БСЖ-вакцината е превентива за туберкулоза и се аплицира кај новороденчињата уште во првите неколку часа од раѓањето.
Петар Догов