Се засилува внатрепартиската кампања во ДУИ. Политичкиот судир на таканаречените „огнени“ и „артанисти“ се случува во Чаир. Вицепремиерот Артан Груби на социјалните мрежи еуфорично го најави вечерашниот собир.
Ми недостигаше ваква мобилизација и еуфорија каква што се создава кога се очекува националниот лидер Али Ахмети. Чаирчани се на нозе, големи и мали зборуваат дека тој доаѓа и дека ќе му ја слушаат пораката. Ви ветувам невиден спектакл, особено за младите. Не пропуштајте па потоа да слушате од други како било на историскиот собир кадешто ќе се гради иднината, напиша груби на фејсбук.
Групата „огнени“ го нарече „собир на артанисти“. Потпретседателот на партијата и поранешен градоначалник на Чаир, Изет Меџити рече дека нема да присуствува бидејќи не е поканет. Смета дека овој собир ќе биде организиран со тероризирање на администрацијата која е под закана да присуствува. Само неколку часа порано, актуелниот градоначалник Висар Ганиу, близок на „огнените“, го означува стартот на мега парк во населбата Топаанско поле. Министрите не се поканети.
За премиерот Ковачевски, разбирливи се собирите и трибините какви што организираше и неговата партија.
Вечерашниот собир на ДУИ во Чаир е дел од серијата партиски активности што паралелно ги прават двете партиски групации со меѓусебни обвинувања за делење на партиското тело. Едните побараа оставка и отчет на вицепремиерот Груби и на другите министри. Другите докажуваат дека ја имаат поддршката од лидерот Али Ахмети и дека членството и натаму ги поддржува.
Соња Николовска