Во случајот на Даравелски се работи за законот за екстрадиција од 2010 година. Ако тој бил во екстрадициона постапка, а ние не знаеме дали во Белград бил, бидејќи се слушна дека и во 2018 година, во 2019 година од владата и министерството за правда имало барање за екстрадиција и ако има писмо, со оглед дека има државјанство од друга држава, тогаш тој рок од една година не важи, истакна адвокатот Александар Новаковски во вечерашната дебата во „Топ тема“ за случајот со екс директорот на Царина кој изминатите 20 години ги мина во Србија и беше недостапен за македонските органи на прогонот.
„Не важи, затоа што тоа во законот е децидно кажано. Рокот од една година во таа постапка не важи. И не верувам дека судот направил превид, затоа што не може, бидејќи одлучува врз основа на целиот предмет. Забуната се создаде со излегување на некои кои велеа дека нема да се дозволи повторување, бидејќи тој има дознато за пресудата. Потоа имаше нејаснотии и околу обидот на судот во Куманово да му ја врачи. Ако судот дозволи повторување на постапка, тогаш се знае дека мора да има ново судење“, е ставот на Новаковски.