Клучен ден за големината и составот на владеачкото мнозинство. Иако формалните одлуки се вечерва, СДСМ и Алијанса веќе се согласија за заедничко владеење од „Илинденска“. Неизвесноста ја одржуваат Алтернатива и „Огнените“ кои се против „делењето на владеачкиот колач“ со партијата на Таравари.
Премиерот Ковачевски посакува Алтернатива да остане во Владата и собраниското мнозинство да се зголемува, но потсетува дека нов владин партнер значи партиско прераспоредување.
Алтернатива најавува дека „ќе почека да се формализира новата коалиција“, а потоа ќе донесе конечна одлука. Во меѓувреме, претседателот Африм Гаши имал средба со Христијан Мицкоски. Во изјавата за ТВ Клан, објаснува дека се работи за средби со сите лидери заради главната цел – двотретинско мнозинство за уставни измени. Од Алтернатива денеска ја потврдуваат изјавата на Мицкоски дека разговорот бил при разминување.
За Алијанса веќе се договорени три министерски функции, меѓу кои во Правда и во Здравство, заменички места во Одбрана и во Земјоделство, директорски позиции во МЕПСО, ПИОМ, Просветниот инспекторат, Тетовската болница и други. Доколку Алтернатива излезе од Владата, ќе го добијат и Министерството за информатичко општество. Во спротивно, Алијанса добива вицепремиер. СДСМ, ДУИ и другите партии ќе направат ротации заради запазување на етничкиот сооднос. Новата коалиција ќе биде официјализирана откако ќе добие согласност од партиските тела.
Соња Николовска